Numbers 32

Jordan Gal-lama Behte

1Reuben-te le Gad-te in ganhon tampi le tuu le keel hon tampi nei uh a, Jazer le Gilead leitangte gankhawi nadingin a hoih lam a mu uh hi. 2Mipi makaite kiangah Moses le siampi Eleazar-te pai uh a, 3“Ataroth, Dibon, Jazel, Nimrah, Heshbon, Elealeh, Sebam, Nebo le Beon - 4Israel-te maiah TOPA in a suksiat gamte - gan khawi nadingin hoih a, ko na nasemte in gan ka nei uh hi. 5Kote in na maipha ka ngah uh leh hih gamte ko tanh dingin na nasemte hong pia in. Kote Jordan-gal hong kahsak kei in,” a ci uh hi. ^a

6 Moses in Reuben-te le Gad-te kiangah, “No hih lai-ah tu-in na gamsung mite uh galsim dingin kuan ding ahi hiam? 7Bang hangin TOPA in amaute a piaksa gamah Israel-te a pai ding uh lungkiasak na hi uh hiam? 8Kadesh Barnea pana na pate uh ka sawl lai-in amaute in zong hih mah ci uh hi: 9Eshcol Kuam tungto-in a gam a galet uh ciangin TOPA in amaute a piaksa gama a lut ding Israel-te a lungkiasak uh hi. 10Tua ni-in TOPA a hehsuaka hih ci-in tomlo in, 11‘Amaute in a lungsimtakpi uh tawh hong zui lo uh ahi manin Egypt pana paikhia kum sawmnih pan a tungsiah a phasa khat beek in, Abraham, Isaac le Jacob tungah kiciama ka khapsa gam - 12Kenez mi Jephunneh tapa Caleb le Nun tapa Joshua-te longal in a mu kei ding hi, ahang in, amaute gel in a lungsim takpi un TOPA a zui uh hi,’ ci-in a kiciam hi. 13Israel tungah TOPA heh lua a, ama muhna-a sia-a gamta khang khat bup a beisiang mateng kum sawmli sung sehnel gamah a vialvaksak hi. ^b

14 “Tu-in note hih lai-ah na pate uh munah dingin a dahhuai mawhnei suakin Israel-te tungah TOPA na hehsakzaw lai ding uh hi. 15Amah na zuih nawn kei uh leh hih mite khempeuh sehnel gamah nusia leuleu dinga, amaute kisiatna no hang hi ding hi,” a ci hi.

16 Tua ciangin amaute a kiangah pai-in, “Kote in ka ganhingte uh adingin gankhawk le ka numei ka naupangte uh adingin khuapi ka sat nuam uh hi. 17Ahi hangin ko le ko galvan tawh kithawi-in Israel-te mai-ah pai-in amau mun ding uh a tun mateng ka puak ding uh hi. Tua hun sung teng ka numei ka naupangte uh a kidal nadingun khuapite kulhin a ki-um ding kisam hi. 18Israel mi peuhmah in amau gouluah ding a ngah mateng in ka inn uah ka ciah kei ding uh hi. 19Jordan galkhat lam peuhmah ah amau tawh luahkhawm ding bangmah ka ngah kei ding uh hi; bang hang hiam cih leh Jordan nisuahna lam teng ko luah ding hi zo hi,” a ci uh hi. ^c

20 Tua ciangin Moses in amaute kiangah, “Note in hih na sep ding uh leh - galsim dingin TOPA mai-ah galhiam tawh na kithawi uh leh 21a mai-ah galte a nawhkhiat mateng galhiam tawh kithawisa-in TOPA mai-ah Jordan kantan-a na pai uh leh - 22tua ciangin TOPA mai-ah leitang a kipiak ciangin TOPA tung le Israel-te tungah na hih ding teng uh a zo suakin note omna-ah na ciah thei pan ding uh hi. Tuateh TOPA mai-ah hih leitang no neihsa hi ding hi.

23 “Ahi hangin na hih zawh kei uh leh TOPA tungah a mawh na suak ding uh a, na mawhna un nomau mah hong pholak ding hi. 24Na numei naupangte uh om nading khuapi lamin, na ganhonte uh om nading gankhawk bawl unla, na kamciamsa bangun zong sem un,” a ci hi. ^d

25 Gad-te le Reuben-te in Moses kiangah, “Ka topa un nong thupiak bangin nangma nasemte in ka sem ding uh hi. 26Ka naupangte uh le ka zite uh, ka tuuhonte uh le ka ganhonte uh hih Gilead khuapi ah a na om ding uh hi. 27Ahi hangin gal sim dinga kithawisa na nasem pasal peuhmah kote topa in nong gen bang tektekin galdo dingin TOPA mai-ah ka galkah ding uh hi,” a ci uh hi.

28 Tua ciangin Moses in siampi Eleazar le Nun tapa Joshua le Israel bawng’ innkuan lutangte tungah amaute thu tawh kisai-in thu a pia hi. 29Amah in amaute kiangah, “Gad-te le Reuben-te galsim dinga kithawisa-in TOPA mai-ah gam hong lakpih uh ciangin Gilead gam amau neih dingin pia un. 30Ahi hangin galhiam tawi loin hong kantan kei uh leh zong note tawh Canaan a nei khawm veve ding uh hi,” a ci hi.

31 Gad-te le Reuben-te in, “TOPA gensa bangin na nasemte in ka hih ding uh hi. 32Galhiam tawisa in TOPA mai-ah, Canaan ah ka pai ding uh a, ahi hangin ka luah ding uh nate Jordan hihlam galah a om ding hi,” ci-in a dawng uh hi.

33 Tua ciangin Moses in Gad-te, Reuben-te le Joseph tapa Manasseh bawng’langte tungah kumpi Sihon kumpi-gam Amor-te pia a, Og kumpi-gam Bashan kumpipa - a gambup tawh a sunga khuapite le a kimkot a gamgite tawh a pia hi. ^e

34 Gad-te in Dibon, Ataroth, Aroer, 35Atroth Shophan Jazer, Jog bawng’ah, 36Beth Nimrah le Beth Haran kulha ki-um khuapi in lam uh a, a ganhonte uh om nading gankhawk a bawl uh hi. 37Tuateh Reuben-te Heshbon, Elealeh le Kiriathaim, 38tuate tawh kibangin Nebo le Baal Meon (hih minte kilaih khin)le Sibmah-te a lampha uh hi. A lamphat uh khuapite min a phuak uh hi. ^f

39 Manasseh tapa Makir suante Gilead ah pai uh a, tua lai-a om Amor-te hawlkhia in a la uh hi. 40Tua ciangin Moses in Manasseh suante ahi Makir-te Gilead pia-a, amaute tua lai-ah a teng uh hi. 41Manasseh suan khat ahi Jair in a khuapi neute la a tuate Havvoth Jair a a phuak hi. 42Tuateh Nobah in Kenath le a kimkot a khuapi neute la a, ama min puasakin Nobah a phuak hi. ^g